ولې لمر او سپوږمۍ راخیژي او بېرته لویږي؟

زموږ ځمکه په هرو څلورویشت ساعتونو کې یو ځل پر خپل شاوخوا څرخي. موږ انسانان او ټول ځمکني موجودات هم د ځمکې د څرخېدو پرمهال له ځمکې سره یو ځای څرخو. کله چې د ځمکې هغه برخه چې موږ پکې اوسو لمر ته مخامخ وي، نو دغه حالت ته ورځ وایو، خو کله چې د څرخېدو له امله د ځمکې همدغه برخه چې موږ پکې اوسو د لمر له وړانګو پنه شي یا مو ورته شا شي، بیا وایو چې شپه شوله. کله چې وایو شپه مخ په خلاصیدو ده یا وایو زیاتي سهار کیږي په حقیقت کې د ځمکې د څرخېدو له امله د ځمکې هغه برخه چې موږ پکې اوسو د لمر خوا ته سوکه سوکه تاویږي، تر هغه چې د لمر څرک ولیږي. په دې حالت کې وایو لمر را وخوت یعنې په حقیقت کې لمر نه دی را ختلی، بلکې ځمکه لمر خوا ته ور تاو شوې ده یا یې مخ ور اړولی دی. د سپوږمۍ په اړه هم موضوع کټ مټ همداسې ده. سپوږمۍ هېڅکله له ختیځه نه راخیژي او په لویدیځ کې نه لویږي، بلکې دا ځمکه ده چې له لویدیځ څخه ختیځ خوا ته پر خپل محور څرخیږي. نو د سپوږمۍ د حرکت په اړه زموږ دغه نظر چې سپوږمۍ له ختیځه را خیژي او په لویدیځ کې لویږي غلط دی. د سپوږمۍ د حرکت په اړه بله تر ټولو مهمه مسئله دا ده چې د سپوږمۍ د ځانګړي مدار له وجهې سپوږمۍ هرځل دقیقاً له ختیځه نه راپورته کیږي او په لویدیځ کې نه لویږي، یعنې ممکن سپوږمۍ له سویل ختیځ یا شمال ختیځ څخه را وخیژي. سربرېره پر دې له دې چې سپوږمۍ ډېر سوکه سوکه له ختیځ څخه لویدیځ خوا ته د ځمکې شاوخوا حرکت کوي، نو په دې اساس هره ورځ پنځوس دقیقې وروسته له تېرې ورځې څخه راخیژي.