سلواغه (دلو) اسماني انځور د نوح ع له توپان سره څه اړیکه لري؟

 

سلواغه یا د اروپایانو په اصطلاح میرآب یو تر ټولو لرغونۍ اسماني انځور دی. د افسانو له مخې میرآب د لرغوني یونان په «سمندر» نومې پراخه سیمې باندې حکومت کاوه. د اسمان په دغه سیمه کې ډېري هغه اسماني انځورونه چې له اوبو سره تړاو لري را ټول دي، مثلاً دلفین، مرغومی، قیطس (Cetus) او رودغاړه یا اریدانوس اسماني انځورونه په دغه سیمه کې راغونډ دي. خلکو دغه اسماني انځورونه د ژوندانه چینه ګڼله، دوی داسې فکر کاوه کله چې لمر له دغه اسماني انځورونو تیریږي، نو باران وریږي.

ډيري لرغوني قومونه د نوح ع توپان په هکله په خپلو تاریخي کتیبو کې یو څه لري، د دغه توپان په اړه په اسماني کتابونو (لکه تورات او قران) کې هم یادونه شوې. لرغوني یونانیان هم په دې باور وو چې دغه توپان د خدای له لورې د فاسد انسانانو د جزا لپاره شوی و. د یوناني افسانو له مخې یوازې دوه تنه له دغه توپانه ژوندي پاتې شول. دغه دوه تنه ښځه او میړه وو چې د دویکالیون (Deucalion) او پیورها (Pyrrha) پنامه یادیدل. دوی هم د نوح ع په څېر د کښتۍ په مرسته وکولی شول له توپانه ژوندي ووځي. له توپان وروسته چې اوبه بیرته کېناستلې، دوی ولیدل چې په ځمکه یوازې دي او نور ټول انسانان له منځه تللي. د دې لپاره چې ځمکه بېرته د اوسیدلو سیمه شي، د زئوس لخوا دوی ته ویل کیږي چې تیږي خپل شاته اچوي، هره تیږه به یې چې شاته اچوله یو انسان به په ځمکه کې پیدا کیدا. ویل کیږي له هغه وروسته دویکالیون د خدای لخوا د سلواغې اسماني انځور په توګه واوښت او اسمان ته پورته شو. د اسمان په ډېرو نقشو کې سلواغه (دلو) اسماني انځور د ځوان ګاني‌مد (Ganymed) په توګه ښودل کیږي چې په لاس کې یې منګی نیولی دی او د خدایانو له لوري مؤظف شوی تر څو انسانانو ته اوبه ورسوي.